គណៈប្រតិភូនៃធនាគារពិភពលោក លោក Paavo Eliste នាយកប្រតិបត្តិកសិកម្ម និងចំណីអាហារសកលសម្រាប់អាស៊ីបូព៌ា និងតំបន់ប៉ាស៊ីហ្វិក បានធ្វើទស្សនកិច្ចនៅសហគមន៍កសិកម្មទំនើបបន្លែផ្ទះសំណាញ់ត្រាំកក់ក្នុងខេត្តតាកែវ
ចេញផ្សាយ 27 Mar 2025
68
តាកែវ៖ ដើម្បីធានាបាននូវការអនុវត្តគម្រោងពិពិធកម្មកសិកម្មកម្ពុជា (CASD) ប្រកបដោយប្រសិទ្ធភាព ក្រុមការងារ ធនាគារពិភពលោកបានធ្វើទស្សនកិច្ចនៅសហគមន៍កសិកម្មទំនើបបន្លែផ្ទះសំណាញ់ត្រាំកក់ក្នុងខេត្តតាកែវ នៅថ្ងៃទី២៦ ខែមីនា ឆ្នាំ២០២៥ ដែលជាផ្នែកមួយនៃបេសកកម្មគាំទ្រការអនុវត្តគម្រោង (ISM)។
គណៈប្រតិភូដឹកនាំដោយប្រធានក្រុមការងារសម្រាប់គម្រោង CASDP នៃធនាគារពិភពលោក, លោកជំទាវ ចំរើន មុទិតា។ រួមដំណើរដោយលោក Paavo Eliste នាយកប្រតិបត្តិកសិកម្ម និងចំណីអាហារសកលសម្រាប់អាស៊ីបូព៌ា និងតំបន់ប៉ាស៊ីហ្វិក និងឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង ព្រមទាំងលោកប្រធានគ្រប់គ្រងគម្រោង CASDP មកពីអន្តរក្រសួង និងក្រុមការងារគម្រោងមកពីធនាគារពិភពលោក និងទីប្រឹក្សាបានអញ្ជើញចូលរួម។
ដំណើរទស្សនកិច្ចទៅកាន់សហគមន៍កសិកម្មទំនើបបន្លែផ្ទះសំណាញ់ត្រាំកក់ក្នុងខេត្តតាកែវ ជាដំណើរទស្សនកិច្ច សំខាន់មួយ មុនពេលចាប់ផ្តើមបេសកកម្មគាំទ្រការអនុវត្តលើកទីប្រាំបួន (9th ISM) សម្រាប់គម្រោងពិពិធកម្ម កសិកម្មកម្ពុជា (CASD) ជាផ្លូវការ។ កម្មវិធីទស្សនកិច្ចនេះបានផ្តល់ឱកាសដ៏មានតម្លៃដល់អ្នកពាក់ព័ន្ធសំខាន់ៗ ការត្រួតពិនិត្យសកម្មភាពគម្រោង និងផ្តល់អនុសាសន៍បច្ចេកទេសក្នុងករណីចាំបាច់។
ក្នុងដំណើរទស្សនកិច្ចនេះ លោក Paavo Eliste និងក្រុមការងារបានទស្សនាផ្ទះសំណាញ់ដែលមានដាំបន្លែសុវត្ថិភាពជាច្រើនប្រភេទ ព្រមទាំងបានជួបជាមួយគណៈគ្រប់គ្រង និងសមាជិកសហគមន៍កសិកម្មទំនើបបន្លែផ្ទះសំណាញ់ត្រាំកក់ ដើម្បីសិក្សាស្វែងយល់ពីបញ្ហាប្រឈម ឱកាស និងផ្នែកតម្រូវការ និងផ្នែកផ្គត់ផ្គង់ អត្ថប្រយោជន៍មានវិសាលភាព និងកំណើនប្រកបដោយនិរន្តរភាព ដែលសហគមន៍បានប្រឹងប្រែងកន្លងមក។
ក្នុងពេលសំណេះសំណាលជាមួយក្រុមការងារបេសកម្មគាំទ្រគម្រោង និងប្រជាសហគមន៍ ឯកឧត្តម ឃឹម ហ្វីណង់ បានសង្កត់ធ្ងន់ថា ការអនុវត្តគម្រោងបច្ចុប្បន្នកំពុងដើរលើផ្លូវរីកចំរើនទៅមុខជាលំដាប់ និងបានលើកឡើងពីសារៈសំខាន់នៃការប្រកាន់ខ្ជាប់យ៉ាងម៉ឺងម៉ាត់នូវផែនការយុទ្ធសាស្រ្ត ដើម្បីបង្កើនអត្ថប្រយោជន៍សម្រាប់សមាជិកភាគហ៊ុនសហគមន៍និយាយដោយឡែក និងសហគមន៍ត្រាំកក់និយាយជារួម។
ជាមួយគ្នានេះដែរ លោក Paavo Eliste ក៏បានសម្តែងការពេញចិត្តចំពោះការរីកចម្រើនរបស់សហគមន៍។ លោកនិងក្រុមការងារធនាគារពិភពលោកមានការប្តេជ្ញាចិត្តឥតងាករេក្នុងការធានាប្រសិទ្ធភាព និងប្រសិទ្ធផលគម្រោង ដែលភាគីពាក់ព័ន្ធត្រូវគ្រប់គ្រងដំណើរការអនុវត្តសកម្មភាពគម្រោងប្រកបដោយប្រសិទ្ធភាព។
