លោក អ៊ូ សំឃិត រស់នៅភូមិក្រោម ឃុំព្រះរំកិល  ស្រុកបូរីអូស្វាយសែនជ័យ ខេត្តស្ទឹងត្រែង មានអាយុ​៣៥ឆ្នាំ ទទួលបានការគាំទ្រពីគម្រោងពិពិធកម្មកសិកម្មកម្ពុជា នូវឥណទានបន្ថែម៤០%នៃទុនវិនិយោគសរុប​សម្រាប់ចិញ្ចឹមជ្រូក តាមរយៈសមាជិកភាពនៃ​សហគមន៍កសិកម្ម​ព្រះ​រំកិល ។

នៅពេលចាប់ផ្តើមអាជីវកម្មចិញ្ចឹមជ្រូក គាត់បានប្រឈមមុខនឹងបញ្ហាខ្វះខាតទុនបង្វិលទិញ​កូនជ្រូក​មក​ចិញ្ចឹម។ មុនពេលទទួលបានឥណទាន លោកបានប្រកបរបរដាំដំឡូងមី និងចិញ្ចឹមជ្រូកចំនួនបីក្បាល ដែល​លោកអាចសន្សំប្រាក់បានតិចតួចប៉ុណ្ណោះក្នុងអំឡុងពេលបិទខ្ទប់ ដោយសារការរីករាលដាលនៃមេរោគ​កូវីដ​១៩។ ជាងនេះទៅទៀត អត្រាស្លាប់ និងជំងឺដល់កូនជ្រូកក៏មានច្រើនផងដែរ ដោយសារគាត់ខ្វះជំនាញ​ក្នុង​វិស័យ​នេះ។

អាស្រ័យហេតុនេះ គម្រោងពិពិធកម្មកសិកម្មកម្ពុជានៃក្រសួងកសិកម្ម រុក្ខាប្រមាញ់ និងនេសាទ ក្រោម​កិច្ច​សហការជាមួយធនាគារពិភពលោក បានពិភាក្សារកដំណោះស្រាយ​ជាមួយអ្នកជំនាញ​បសុ​សត្វ​មកពីមន្ទីរ​កសិកម្ម រុក្ខាប្រមាញ់ និងនេសាទខេត្តស្ទឹងត្រែង។ តាមការណែនាំរបស់ PDAFF ដែល​មានភាពប៉ិន​ប្រសប់​ផ្នែកវិទ្យាសាស្រ្តសហគ្រាសចិញ្ចឹមជ្រូក លោក អ៊ូ សំឃីត មានឱកាសចូលរួមវគ្គបណ្តុះបណ្តាល​ជំនាញ ចិញ្ចឹម​ជ្រូក​ជាមួយ​សមាជិកសហគមន៍ផ្សេងទៀត នៅការិយាល័យសហគមន៍កសិកម្មព្រះរំកិលក្នុងឆ្នាំ២០២៣។ សមា​ជិកទាំង​អស់ទទួលបានការណែនាំ និងបានចុះទៅមើលកសិដ្ឋានក្បែរៗនៅក្នុងខេត្តផងដែរ។

លោក សំឃិត បានឱ្យដឹងថា «ខ្ញុំចាប់ផ្តើមចិញ្ចឹមជ្រូកនៅឆ្នាំ២០១៥ មកដល់ពេលនេះមានរយៈពេល៨​ ឆ្នាំ​ហើយ។ ខ្ញុំជួបបញ្ហាច្រើនក្នុង​ការចិញ្ចឹម​ជ្រូក​​នៅសម័យកូវីដដោយសារការបិទខ្ទប់ និងការធ្វើដំឡូងមី​ក៏មាន​បញ្ហា​​ដូចគ្នា ខ្ញុំក៏ងាកមកចិញ្ចឹម​ជ្រូកវិញ។

លោក សំឃិត បានបន្ថែមទៀតថា «មុនពេលអន្តរាគមន៍របស់គម្រោង ខ្ញុំជួបការលំបាក់ខ្លះ​ក្នុង​ការចិញ្ចឹម​ជ្រូក ដោយសារខ្ញុំមិនមានចំណេះ​ដឹង​ពីជំងឺ​ជ្រូកថាវាឈឺបណ្តាលមកពីមូលហេតុអ្វី យើងអត់ស្គាល់ថ្នាំ​យកមកប្រើ​ឱ្យ​ត្រូវ​​នឹងប្រភេទជំងឺ។»

ដោយមានការគាំទ្រពីគម្រោង CASDP នូវឥណទាន៤០% យកមកពង្រីកអាជីវកម្មចិញ្ចឹមជ្រូក លោក​សំឃិត​ ត្រូវបានអញ្ជើញឱ្យចូលរួមវគ្គបណ្តុះបណ្តាលស្តីពីការចិញ្ចឹមជ្រូក ការថែទាំកូន​ជ្រូក និង​ការឱ្យចំណីជ្រូក និងក្រោយពីបញ្ចប់វគ្គ​បណ្តាល​បណ្តាល​ គាត់បាន​យល់​ពី​របៀប​សង្កេត​មើល​ការ​ចិញ្ចឹម​ជ្រូក។ល។

ក្នុងពេលបណ្តុះបណ្តាល អ្នកជំនាញមកពី PDAFF បានយកចិត្តទុកដាក់ជាពិសេស​ទៅលើការបញ្ចុះ​ព្រូន​ឱ្យបានទៀងទាត់ ការចាក់វ៉ាក់សាំងទាន់ពេលវេលា និងការសម្អាតទ្រុងអោយបានត្រឹមត្រូវ និងបាញ់ទឹក​ដើម្បី​​កាត់​បន្ថយការស្លាប់របស់ជ្រូកនៅក្នុងកសិដ្ឋាន។ ក្រោយពីទទួលបានការណែនាំស្តីពីការអនុវត្តគ្រប់គ្រង​ចិញ្ចឹមជ្រូកដែលមន្ទីរជំនាញបានផ្តល់អោយ លោក សំឃិត ទទួលបានផលប្រយោជន៍ច្រើន ដោយគាត់អាច​លក់​ជ្រូក​​យកសាច់​ចំនួន​៣០ក្បាល និងកូនជ្រូកពូជចំនួន៥០ក្បាល នៅក្នុងឆ្នាំ២០២៣ ដោយទុកកូនជ្រូក​ដែលនៅ​សល់​សម្រាប់ធ្វើពូជ​បន្ត។ គាត់​បានលក់​ជ្រូក​ឈ្មោល និង​ចាស់​សម្រាប់យកសាច់។ ចំណែក​ទីផ្សារ​ជ្រូក​វិញ លោក សំឃិត បានលក់​អ្នក​ភូមិ និង​អាជីវករ​ជ្រូក​យកសាច់មកពី​ខេត្ត។

បច្ចុប្បន្ន​លោក សំឃឹ​ត ​បានផ្លាស់​ប្តូរជីវភាព​ច្រើន​បន្ទាប់​ពី​ជ្រើស​រើស​យករបរចិញ្ចឹម​ជ្រូក ។ ឥឡូវ​នេះ គាត់​មាន​ដីកសិដ្ឋាន​ចិញ្ចឹម​ជ្រូក​យ៉ាង​ទូលំទូលាយ និង​មាន​កន្លែង​សត្តឃាតផ្ទាល់ខ្លួន។ ចំណូលពីការលក់ជ្រូក​បានជួយ​ផ្គត់ផ្គង់គ្រួសារ ហើយគាត់បានប្រើប្រាស់ថវិកាដែលនៅសល់យកទៅពង្រីកមុខរបរបន្ថែម ដូចជាដាំ​ស្វាយចន្ទី និង​ដំឡូងមី ក្នុងនោះដំណាំស្វាយចន្ទីប្រហែល១០ ហិកតា និងដំឡូងមីប្រហែល៣ ទៅ ៤ ហិកតា។

លោក សំឃិត កាន់តែមាន​កេរ្តិ៍ឈ្មោះជាអ្នកចិញ្ចឹម​ជ្រូក​មាន​គុណភាព​ល្អ ហើយមាន​តម្រូវការ​ច្រើន​រហូត​មានឈ្មួញ​មករក​ទិញជាហូរហែរ​។ លោក​សម្រេច​លក់​ជ្រូក​​ឲ្យ​អ្នកទិញផ្ទាល់ជៀសវាងលក់ឱ្យ​ឈ្មួញ​កណ្តាល​ដែល​តែងតែឲ្យ​តម្លៃ​ទាបជាងទីផ្សារ។ អាជីវករ​នៅ​ក្រុង​ស្ទឹងត្រែង​ក៏​បានមកទាក់ទង​ទិញជ្រូកពីគាត់​យក​ទៅលក់​បន្ត។ លោក សំឃិត ជាអ្នកប្រកបរបរចិញ្ចឹមជ្រូក ដោយគាត់រីករាយក្នុងការ ចែករំលែក​ ​បទពិសោធន៍​​ជោគជ័យ​របស់​គាត់ ទៅដល់កសិករជាច្រើននៅក្នុងសហគមន៍ ហើយមានកសិករចន្លោះពី១៥ ទៅ​ ២០ នាក់​បាន​ចាប់ផ្តើមចិញ្ចឹម​ជ្រូក​ដូចជាគាត់ដែរ។ ពេលនេះសមាជិកសហគមន៍សប្បាយចិត្ត និងពេញចិត្ត​ជាមួយ​​ការសម្រេច​ចិត្តរបស់ពួកគេ ហើយថាគ្មានបញ្ហាអ្វីទៀតទេក្នុងការចិញ្ចឹមជ្រូកដែលជាមុខរបរចិញ្ចឹមជីវិត។

លោក អ៊ូ សំឃិត បានឱ្យដឹងថា "ខ្ញុំសប្បាយចិត្តជាមួយនឹងអាជីវកម្មចិញ្ចឹមជ្រូក។ ខ្ញុំសូមអរគុណដល់​គម្រោង CASDP ដែលផ្តល់ជំនួយ ៤០% យកមកចិញ្ចឹមជ្រូក ដែលធ្វើអោយខ្ញុំ​អាចពង្រីកអាជីវកម្ម​បានពីរ​បន្ថែម​ទៀត" ។

ស្របពេលជាមួយគ្នា​នេះដែរ លោក សំឃិត បាន​ជំរុញ​ឲ្យ​ស្ត្រី​ក្នុង​ភូមិ​ពិចារណាងាកមកចិញ្ចឹម​ជ្រូក​ដូច​លោក​ដែរ ព្រោះ​វាអាច​រក​ប្រាក់​ចិញ្ចឹម​គ្រួសារបាន។ ជាចុងក្រោយ លោកបានស្នើដល់គម្រោង CASDP ផ្តល់​បទពិសោធន៍​បន្ថែមដល់កសិករដូចរូបលោក និងជួយស្វែងរកទីផ្សារដែលមានតម្លៃប្រសើរជាងមុន។