លោក បណ្ឌិត សរ ចិត្រា ពិភាក្សាការងារជាមួយដៃគូ UNIDO ស្តីពីការពង្រឹងប្រព័ន្ធគ្រប់គ្រងសុវត្វិភាព សុខមាលភាពចំណីអាហារព្រះរាជាណាចក្រកម្ពុជា
រាជរដ្ឋាភិបាលកម្ពុជា តាមរយៈក្រសួងកសិកម្ម រុក្ខាប្រមាញ់ និងនេសាទ បានខិតខំធានាសុវត្ថិភាពចំណីអាហាសម្រាប់អ្នកប្រើប្រាស់ឱ្យកាន់តែប្រសើរជាងមុន ស្វែងរកទីផ្សារអន្តរជាតិសម្រាប់នាំចេញចំណីអាហារ និងកែលម្អប្រព័ន្ធគ្រប់គ្រងសុវត្ថិភាព ដែលនេះជាការងារចាំបាច់សម្រាប់អ្នកពាក់ព័ន្ធទាំងអស់មានឱកាសជួបជជែកគ្នា និងដោះស្រាយបញ្ហាពាក់ព័ន្ធ។ ជាក់ស្តែង នៅថ្ងៃពុធ ២ កើត ខែជេស្ឋ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី០១ ខែមិថុនា ឆ្នាំ២០២២ លោកបណ្ឌិត សរ ចិត្រា អគ្គលេខាធិការរងនៃក្រសួងកសិកម្ម រុក្ខាប្រមាញ់ និងនេសាទ (MAFF) និងជានាយកគម្រោងពិពិធកម្មកសិកម្មកម្ពុជា (CASDP) បានទទួលជួបពិភាក្សាការងារជាមួយគណៈប្រតិភូ UNIDO ដឹកនាំដោយលោកស្រី Helena Silva ទីប្រឹក្សាផ្នែកមីក្រូជិវវិទ្យា និងប្រព័ន្ធគ្រប់គ្រងចំណីអាហារ និងលោក Rogerio Mendes ទីប្រឹក្សាផ្នែកប្រព័ន្ធគីមីវិទ្យា និងគុណភាព នៅទីស្តីការក្រសួង។ នៅក្នុងបទបង្ហាញទៅកាន់អង្គប្រជុំ លោកស្រីបានលើកឡើងពីស្ថានភាពសមត្ថភាពធ្វើតេស្តន៍នៅក្នុងមន្ទីពិសោធន៍ និងសេវាពាក់ព័ន្ធនៅកម្ពុជានាពេលបច្ចុប្បន្ន បញ្ហាប្រឈមចំពោះចំណីអាហារ និងការគ្រប់គ្រងមន្ទីពិសោធន៍កសិកម្ម និងទិសដៅនាពេលអនាគត។
