ឯកឧត្ដម ហ៊ាន វណ្ណហន បានលើកទឹកចិត្តសហគមន៍កសិកម្មឃុំសូរ្យសែនចិញ្ចឹមគោយកសាច់ និងបន្លែសុវរ្ថភាព អនុវត្តផែនការសកម្មភាពស្របតាមស្តង់ដារ និងបច្ចេកទេសផលិតកម្មខ្សែរចង្វាក់តម្លៃត្រឹមត្រូវ
ថ្ងៃសុក្រ ៦ រោច ខែចេត្រ ឆ្នាំខាល ចត្វាស័ក ព.ស ២៥៦៥ត្រូវនឹងថ្ងៃទី២២ ខែមេសា ឆ្នាំ២០២២ ឯកឧត្ដម ហ៊ាន វណ្ណហន រដ្ឋលេខាធិការ និងជាប្រធានគណៈកម្មការតម្រង់ទិសនៃគម្រោងពិពិធ កម្មកសិកម្មកម្ពុជាបានដឹកនាំក្រុមការងារចុះពិនិត្យវឌ្ឍនភាពសកម្មភាពការចិញ្ចឹមមាន់ ត្រីនិងកង្កែប និងការដាំបន្លែ និងជួបពិភាក្សាជាមួយគណកម្មការនិងសមាជិកក្រុមផលិតផែនការអាជីវកម្មចិញ្ចឹមគោយកសាច់ និងដាំបន្លែសុវត្ថិភាពនៅភូមិត្រពាំងត្នោត ឃុំសូរ្យសែន ស្រុកព្រៃឈរ ខេត្តកំពង់ចាម ដែលជាសកម្មភាពអនុវត្តក្រោមកម្មវិធីសង្គ្រោះបន្ទាន់ដោយសារការរីករាលដាលនៃជំងឺកូវីដ១៩។ ឯកឧត្តម ក៏បានពិនិត្យវឌ្ឍនភាពផែនការអាជីវកម្មចិញ្ចឹមគោយកសាច់ និងដាំបន្លែសុវត្ថិភាពដែលបានអនុម័តរួចហើយ ក្រោមគម្រោងពិពិធកម្មកសិកម្មកម្ពុជា។ ក្រុមការងារអញ្ជើញរួមដំណើរជាមួយឯកឧត្តមប្រធានរួមមាន មន្ត្រី និងទីប្រឹក្សាគម្រោង អមដោយមន្ត្រីនៃមន្ទីរកសិកម្ម រុក្ខាប្រមាញ់ ខេត្តកំពង់ចាម។
ដំណើរទស្សនៈកិច្ចនេះធ្វើឡើងក្នុងគោលបំណងសំខាន់ៗដូចខាងក្រោម៖
១).ពង្រឹងការងារបច្ចេកទេស ជាពិសេសផែនការអនុវត្តកម្មវិធីកសិធុរកិច្ចនៅថ្នាក់ក្រោមជាតិ ដោយមានជំនួយពីក្រុមការងារថ្នាក់ជាតិ។
២).ពិនិត្យស្ថានភាពទូទៅរបស់សហគមន៍ និងពិភាក្សាពីសក្តានុពលកសិផលដែលអាចពង្រីកទីផ្សារជួបជាមួយអ្នកពាក់ព័ន្ធដើម្បីពិភាក្សាពីបទពិសោធន៍ និងលទ្ធភាពរបស់សហគមន៍កសិកម្មក្នុងការរៀបចំសំណើរពង្រីកកសិធុរកិច្ច។
៣).ផ្តល់អនុសាសន៍ដល់មន្ទីរកសិកម្ម រុក្ខាប្រមាញ់ និងនេសាទខេត្ដគោលដៅ និងសហគមន៍កសិកម្មអំពីដំណើរការនៃការរៀបចំសំណើរកសិធុរកិច្ច និងព័ត៌មានពាក់ព័ន្ធ។
ក្រោយពីបានជួបពិភាក្សាជាមួយគណកម្មការ និងសមាជិកក្រុមផលិតអំពីផែនការអាជីវកម្មដែលបានអនុម័តដោយផ្ដោតទៅលើការចិញ្ចឹមគោយកសាច់ និងដាំបន្លែសុវត្ថិភាពរួចមក ឯកឧត្ដម ហ៊ាន វណ្ណហន បានចុះទៅពិនិត្យដោយផ្ទាល់ដល់កន្លែងចិញ្ចឹមគោ និងដាំដុះបន្លែ។
ក្នុងជំនួបជាមួយសហគមន៍ ឯកឧត្តមប្រធានបានផ្តល់អនុសាសន៍ថា សហគមន៍កសិកម្ម និងក្រុមផលិតគួរតែផ្លាស់ប្ដូរទីតាំងចិញ្ចឹមគោពីក្រោមផ្ទះ មកទីតាំងណាមួយដែលនៅជិតផ្ទះ និងមានរោងច្បាស់លាស់ និងចិញ្ចឹមប្រកបដោយបច្ចេកទេស។ រីឯការផ្ដល់ចំណីដល់គោគួរតែជាចំណីផ្សំ ដើម្បីភាពលូតលាស់របស់គោបានឆាប់រហ័ស និងឆាប់បានចរាចរលើទីផ្សារ។ ចំពោះការដាំបន្លែវិញ ការដាំដុះបន្លែត្រូវមានលក្ខណបច្ចេកទេស និងឲ្យបានត្រឹមត្រូវទាំងការដាំដុះ ការថែទាំ និងការប្រមូលផល។ សហគមន៍កសិកម្មត្រូវព្យាយាមស្វែងរកដៃគូអាជីវកម្មកសិកម្ម និងទីផ្សារសម្រាប់ផលិតផលទាំងពីរឲ្យបានទូលំទូលាយ។
